إعملوا أي حاقة بأي شيء !

" إعملوا أي حاقة بأي شيء " 

هالمصطلح على كثر غرابته إلا إنه علَّمني أن الفراغ كنز لا يفنى

كلاسات الإنجلش .. هي الزاوية السوداء في تاريخ دراستنا ، أكثر شي جابلنا التعقيد في حياتنا .. كنَّا نخاف لا تجي الساعة ثمانية وعشر وحنا ما دخلنا الكلاس ، تخيلوا ننحسب غياب !

وحنا ياويلي تونا مستجدات نسمع بسوالف وقصص الحرمان وكذا ونخاف لا يصير لنا نفس الشي ، كللللللللنا نحضر، وكللللللللنا نحضِّر المحاضرة من اليوم اللي قبل  ، بس اللي يتفاعلون ، ثنتين ثلاث والبقية عايشين أجواء الصدمة 

الله يذكرك بالخير يا مس ليلى ، لو إني من الإدارة كنت عطيتك وسام " يا مهجِّدهم "

المس اخترعت لنا مادة رائعة إسمها "dictogloss "
 يقولكم ياسادة إن هالمادة لابد وتنمى حاسة الفهم والتلخيص ، يعني تسرد لنا مقالة أو موضوع ، وممنوع نمسك الأقلام " الناس اللي يقعدون ورا كانوا يغشون " ونسمع ، بعدين نلخص اللي فهمناه .. لعن أبو الشياطين واللي مافهم شي وش يسوي

لحد يناظر مدري شلون أصلا أنا كنت أفهم كل شي

أنواع التعذيب اللي عشناها كانت تنمي بداخلنا إحساس النقص ، أيوه .. نقص إننا مانقدر نتمرَّد مثل كل الطلاب والطالبات حول العالم .. إلتزام إلتزام .. ما نعرف كيف نسحب ، ما نعرف كيف نغيب ، ما نعرف كيف نطنِّش.. أذكر مرَّة جيت من البيت يوم مطر على وجهي عشان توتوريا فيزيكس  < الدفارة

وهالإحساس ، تعوَّض على نص التيرم ، لمَّا وصلت لنا دكتورة نائلة بالسلامة .. حركات يعيّشك وبنبحك برشا .. لقينا أحد نقدر نفرِّغ فيه أنواع العقد النفسيَّة .. فمثلاً .. لو بنسوي أنا وعبير إننا بنسحب ، نروح نستأذن منها إننا بنتأخر عشر دقايق وبنجي ، لا بالله يالمهمَّات أنتِ ويَّاها  ، يعني إن المحاضرة ماراح تمشي من غيركم 

وبعدين نسحب ، ونجي بالربع الأخير 

نظام أستأذن إني أسحب .. شي 

- حاليًّا .. رواسب هالذكريات ممكن تكون تلاشت مع هموم كلاسات رابع وخامس .. لكن فعلاً على كثر ماكانت أليمة بوقتها .. على كثر ماهي أكثر شي يخلينا نضحك لاتذكرنا أيامنا فيها